Нұсқаулық медицинада қолданылуы бойынша
дәрілік заттың
 
РИБОКСИН
Саудалық атауы
Рибоксин

Халықаралық патенттелмеген атауы
Инозин

Дәрілік түрі
Көктамыр ішіне енгізуге арналған ерітінді 20 мг/мл

Құрамы
1 мл ерітіндінің құрамында
белсенді зат: инозин - 20 мг;
қосымша заттар: гексаметилентетрамин, инъекцияға арналған су.
 
Сипаттамасы
Мөлдір түссіз сұйықтық.
 
Фармакотерапиялық топ
Басқа кардиотоникалық препараттар.

АТХ коды С01ЕВ.
 
Фармакологиялық қасиеттері
Фармакокинетика
Енгізген кезде рибоксин тіндерде тез таралады. Ол бауырда метаболизденеді, онда ол организмнің биохимиялық реакцияларында толығымен жойылады. Аздаған мөлшерде негізінен несеппен шығарылады.

Фармакодинамика
Рибоксин – антигипоксикалық және аритмияға қарсы әсері бар анаболикалық препарат.
Ол АТФ прекурсоры болып табылады, глюкоза алмасуына тікелей қатысады және гипоксия жағдайында және АТФ болмаған кезде метаболизмнің белсендірілуіне ықпал етеді. Препарат тіндердің қалыпты тыныс алу процесін қамтамасыз ету үшін пирожүзім қышқылының метаболизмін белсендіреді, сонымен қатар ксантиндегидрогеназаның белсендірілуіне ықпал етеді. Рибоксин миокардтағы зат алмасуға оң әсер етеді, атап айтқанда жасушалардың энергетикалық теңгерімін арттырады, нуклеотидтер синтезін көтермелейді, Кребс циклінің бірқатар ферменттерінің белсенділігін күшейтеді. Препарат миокардтың жиырылу белсенділігін қалыпқа келтіреді және олар қозған кезде жасушаларға енген кальций иондарын байланыстыру қабілеті есебінен диастолада миокардтың толық босаңсуына ықпал етеді, тіндердің (әсіресе миокард пен асқорыту өзегінің шырышты қабығының) регенерациясын белсендіреді.
 
Қолдануға көрсеткіштер

• жүректің ишемиялық ауруы, оның ішінде миокард инфарктісі, стенокардия, коронарлық жеткіліксіздік (кешенді ем құрамында)
• жүрек ырғағының бұзылуы
• жүрек гликозидтері препараттарымен уыттану
• әртүрлі генездегі кардиомиопатияларды, миокард дистрофияларын (ауыр дене жүктемелері, инфекциялық және эндокриндік генез фонында), миокардиттерді емдеу
• бауыр аурулары (гепатиттер, бауыр циррозы, бауырдың майлы дистрофиясы)

Қолдану тәсілі және дозалары
Ересектерге көктамыр ішіне тамшылатып немесе ағынмен енгізеді. Алдымен 200 мг (10 мл 2% ерітінді) күніне 1 рет, содан кейін жақсы төзімділікпен — 400 мг-ға дейін (20 мл 2% ерітінді) күніне 1-2 рет енгізіледі. Емдеу курсы жекелей анықталады (орта есеппен 10-15 күн). Көктамырға тамшылатып енгізгенде препараттың 2% ерітіндісін 5% глюкоза ерітіндісінде немесе 0,9% натрий хлориді ерітіндісінде (250 мл-ге дейін) сұйылтады. Препаратты тамшылатып баяу, 1 минут ішінде 40-60 тамшыдан енгізеді. Жүрек ырғағының жіті бұзылулары кезінде 200 - 400 мг (10-20 мл 2% ерітінді) бір реттік дозада сиялы түрде енгізуге болады.
 
Жағымсыз әсерлері
Иммундық жүйе, тері және тері асты тіндері тарапынан: аллергиялық/анафилактикалық реакциялар, соның ішінде бөртпе, қышу сезімі, терінің қызаруы, есекжем, анафилактикалық шок.
Жүрек-қантамыр жүйесі тарапынан: тахикардия, артериялық гипотензия, ол бас ауыруымен, бас айналумен, жүрек айну сезімімен, құсумен, тершеңдікпен қатар жүруі мүмкін.
Зат алмасу, зат алмасу тарапынан: гиперурикемия, подаграның өршуі (жоғары дозаларды ұзақ уақыт қабылдағанда).
Жалпы бұзылулар: жалпы әлсіздік, енгізу орнындағы өзгерістер (гиперемияны, қышынуды қоса).
 
Қолдануға болмайтын жағдайлар
– Инозинге немесе препараттың басқа компоненттеріне аса жоғары сезімталдық
– гиперурикемия
– бүйрек жеткіліксіздігі
– подагра
- жүктілік және лактация кезеңі
- 18 жасқа дейінгі балалар мен жасөспірімдер.
 
Дәрілермен өзара әрекеттесуі
Препаратты басқа дәрілік заттармен бір мезгілде қолданғанда мүмкін:
гепаринмен бірге: гепариннің әсерін күшейту, оның әсер ету ұзақтығын арттыру;
жүрек гликозидтерімен: аритмиялардың туындауының алдын алу, оң инотропты әсерді күшейту.
Препаратты β-адреноблокаторлармен бір мезгілде қолданғанда рибоксиннің әсері төмендемейді.
Нитроглицеринмен, нифедипинмен, фуросемидпен, спиронолактонмен бір мезгілде қолдануға болады.
Алкалоидтармен, қышқылдармен, спирттермен, ауыр металдардың тұздарымен, танинмен, В дәруменімен бір ыдыста үйлеспейді₆ (пиридоксин гидрохлоридімен).
 
Айрықша нұсқаулар
Егер терінің қышуы және қызаруы пайда болса, препаратпен емдеуді тоқтату керек.
Емдеу кезінде қандағы және несептегі мочевина концентрациясының деңгейін бақылау қажет. Препаратты қолдану үшін шектеу бүйрек жеткіліксіздігі болып табылады. Бүйрек жеткіліксіздігі кезінде препаратты дәрігердің пікірі бойынша, күтілетін әсер қолдану кезінде мүмкін болатын қауіптен асып кеткен жағдайда ғана тағайындаған жөн.
 
Жүктілік немесе бала емізу кезеңінде қолдану.
Пациенттердің осы тобы үшін қолданудың тиімділігі мен қауіпсіздігіне зерттеулер жүргізілген жоқ, сондықтан оны жүктілік немесе бала емізу кезеңінде қолдануға болмайды.
 
Автокөлікті немесе басқа механизмдерді басқару кезінде реакция жылдамдығына әсер ету мүмкіндігі.
Препарат автокөлікті басқару және күрделі механизмдермен жұмыс істеу қабілетіне кері әсерін тигізбейді.
 
Балалар
Препаратты қолдану қауіпсіздігі туралы деректердің болмауына байланысты балаларға қолдануға болмайды.
 
Артық дозалануы
Жағымсыз реакциялар симптомдарының көріністері күшеюі мүмкін.
Емдеу. Препаратты тоқтату, симптоматикалық ем.
 
Шығарылу түрі және қаптамасы
Шыны ампулаларда 5 мл немесе 10 мл препараттан.
Сыйымдылығы 5 мл немесе 10 мл 5 ампуладан үлбірден жасалған пішінді ұяшықты қаптамаға салынады. 2 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге қаптамаға салынады.
Ескертпе. Нүктесі немесе бұзу сақинасы бар ампулаларды пайдаланған кезде скарификаторлар салынбайды.
 
Сақтау шарттары
Түпнұсқалық қаптамасында 25°С аспайтын температурада сақтау керек.
Балалардың қолы жетпейтін жерде сақтау керек!
 
Сақтау мерзімі
4 жыл
Қаптамада көрсетілген жарамдылық мерзімі өткеннен кейін қолдануға болмайды.
 
Дәріханалардан шығу шарттары
Рецепт бойынша
 
Өндіруші
"Галичфарм" ЖАҚ
Украина, 79024, Львов қ., Опрышковская көш., 6/8
Тіркеу куәлігінің иесі
"Галичфарм" ЖАҚ
 
Қазақстан Республикасының аумағында тұтынушылардан өнім сапасына қатысты шағымдарды қабылдайтын ұйымның мекенжайы:
"Артериум" корпорациясының Қазақстан Республикасындағы өкілдігі
050060, Алматы қ., Әл-Фараби даңғылы, 97 үй, 3 кіреберіс, "54" кеңсе
Тел/факс: 8(727)315-82-09; 8(727)315-82-10;
Е-mail: Almaty@arterium.ua
 
Қазақстан Республикасының аумағындағы дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері:
"Артериум" корпорациясының Қазақстан Республикасындағы өкілдігі
050060, Алматы қ., Әл-Фараби даңғылы, 97 үй, 3 кіреберіс, "54" кеңсе
Тел/факс: 8(727)315-82-09; 8(727)315-82-10;
Е-mail: Almaty@arterium.ua